ኣብ ልዕሊ ህዝቢ ፅልኣት ክሓድር ዝገብራ ፣ድሌት ህዝቢ ዘየማልኣን ንሕጊ ሚድያን ኣዋጅ ብሮድካስትን ዘይግዝኣ ሚድያታት ብሕግን ብታሪኽን ተሓተትቲ ምዃነን ሓላፊት ቢሮ ርክብ ህዝብን መንግስትን ትግራይ ወይዘሮ ሊያ ካሳ ኣፍሊጠን ።

“ሚድያ ሃገርና ብመንፅር ህዝቢ” ብዝብል ስያመ ብኣሰናደኣይነት በዓል መዚ ብሮድካስት ኢትዮጵያን ሓገዝ ዩኤንዲፒን ዝተሰናድአ መድረኽ ኣብ ከተማ መቐለ ይሳለጥ ኣብ ዘሎ መድረኽ ዘተ ዝተረኸባ ወይዘሮ ሊያ ካሳ፤ ኣብቶም ዝሓለፉ 28 ዓመታት ኣብዛ ሃገር ኣብ ዝተመዝገቡ ኩለመዳያዊ ዓወታት ሚድያታት እዛ ሃገር እጃመን ከምዝተዋፅኣ ብምዝኽኻር ኣብቶም ዝሓለፉ ሒደት ዓመታት ግን ኣብዛ ሃገር ዜጋታት እናተቐትሉ ፣ እናተመዛበሉ ኣውራ ሓበራዊ መንገድታት እናተዓፀው ከምዘይረኣያ ወይ እውን ነኺአን ዝሓልፋሉ ኩነታት ከምዘሎን ይትረፍ ፀገማት ከቃልሓ ኣብ ልዕሊ ህዝቢ ትግራይ ፀለመ ከካይዳ ፀኒሐን እየን ኢለን።